فرهنگ عقیق

هه‌مامه‌و کوڵه‌داستانێ هه‌ورامیێ و ناحه‌زه‌کێ و به‌روسه‌ی ئێحساسه‌‌که‌یشابه‌ نامێ خوای گه‌وره‌ی شۆکر په‌ی خوای هه‌مامه‌و کوڵه‌داستانێ هه‌ورامیێ جه‌ نۆدشه‌نه‌ لوا ڕاوه‌ و ئانه‌ ئاواتۆ دڵسۆزاو زوانی هه‌ورامی بێ ، به‌ گا ئاما . ئی هه‌مامه‌ به‌ شاهێذی فره‌و که‌سا جه‌ نۆعوو وێشه‌نه‌ بێ وێنه‌ بێ و تا ئیسه‌ جه‌ مه‌حاڵوو هه‌ورامانیه‌نه‌ هه‌رمانێوه‌ی چێمنێ نه‌کریا‌ی بێ . یاوگه‌و ئێمه‌ چی هه‌رمانێ ئینه‌ بێ که‌ جوانه‌کێما ، ڕۆڵه‌کێما نه‌ته‌رس پڕانه‌ مه‌یذانوو نویسته‌ی و به‌ هه‌ورامی بنویسا من دڵنیانا ئه‌پی یاوگه‌یما یاواینمی ‌هه‌ر چن په‌ی یاوای به‌ ئامانجه‌ به‌رزه‌کا ڕایوه‌ توول و درێژه‌ ئینا وه‌رمانه‌. جه‌ قووڵایی دڵیمه‌وه‌سپاسێوی فره ‌و فراوانم هه‌ن په‌ی ئا ئازیزا که‌ به‌ ده‌عوه‌ته‌که‌و ئێمه‌ به‌ڵێشا وات و نه‌ته‌رسانه‌ ئامه‌ینه‌ دلێ مه‌یذانوو نویسه‌ی و قه‌ڵه‌مشا گێرت ده‌سه‌وه‌ و تاپۆو نه‌نویسه‌یشا ماڕا و سه‌نه‌دوو زوان بیه‌ی هه‌ورامیشا ئیمزاکه‌رذ. من به‌ شانازیه‌وه‌ ده‌سوو گرذێ ماچ که‌روو. گه‌ره‌کم نیا فره‌ بلوو قووڵایی ئی بابه‌تیه‌ره‌‌ و پێسه‌و نه‌قدێوی باسوو هه‌مامه‌که‌ی که‌روو . چونکای ده‌سی که‌م ده‌ که‌سێ جه‌ نویسه‌راو  هه‌ورامانی ئی هه‌رمانێشا که‌رذێنه‌ و من دڵنیانا ده‌سکه‌وته‌کێ ئی هه‌مامه‌یه‌ فره‌فرێنێ و هه‌روه‌ره‌نه‌ فره‌ته‌رێ با و ئی باسه‌یه‌ مازوه‌وه‌ په‌ی وه‌ختێو ته‌ری . پی بۆنه‌وه‌ یه‌ک ڕاس ملوو سه‌روو باسه‌که‌یم. ئێمه‌ ئینایمێ ئه‌وه‌ڵوو ڕایوه‌ . ڕایوه‌ که‌ تا دویه‌ر ساڵێ چه‌یوه‌ڵ ڕانه‌لواکێش جه‌ کلکاو ده‌سی نه‌ترازیێنێ . چن ساڵێ چه‌یوه‌ڵ که‌سێو ویروو ئانه‌ی نه‌که‌رێ که‌ ڕوێو به‌ی وه‌ره‌وه‌ خه‌ڵکی به‌ هه‌ورامی بنویسا. ڕه‌نگا چن که‌سێو بێنێ که‌ ئاذێچێ به‌ ته‌نیایی و په‌ی دڵوو وێشا نویسێنێ و خه‌ڵکی به‌ نویسه‌که‌و ئاذیشا خوه‌ش ئه‌ی ئه‌گه‌ر بلی دلێ په‌لیانه‌کا ئا ئازیزا وینی که‌ چ ته‌شه‌ر و تانێوشا ونه‌ دریان و ئاذێچێ به‌ ئه‌وپه‌ڕوو ئێحترامیه‌وه‌ جوابشا دانه‌وه‌ و دڵێشا به‌ده‌س ئارذێنێ. بارها قسێ واچیه‌ینێ و ته‌شه‌رێ دریه‌ینێ و واته‌نشا ئاخۆر زوانێو که‌ خه‌ریکا جه‌ به‌ین ملۆ و ماحف بۆوه‌ شمه‌ خه‌ریکێ چێشیه‌ندێ ؟! ( جه‌ باره‌و ئا که‌سایه‌تیا هه‌ورامانیه‌ و چه‌نی ده‌سپنه‌ که‌رذه‌ی ره‌وتی نویسیاری هه‌ورامی چێگه‌نه‌ هیچ نمه‌نویسوو چوون باسێوی تایبه‌تا و به‌ درێژی باسه‌که‌م نویسته‌ن و وه‌ختێوته‌ر مارووش سه‌روو سایتی) . چن ڕوێ دمامو هه‌مامه‌که‌ی دۆسێوی ئازیز په‌یوه‌ندیش چنی گێرتا ماچۆ کاکه‌ قسێما پنه‌ ماچا جه‌ فه‌یزبووکه‌نه‌ باسوو هه‌مامه‌که‌یشا که‌رذه‌ن و هه‌ڵمه‌ته‌شا په‌ی به‌رذێنمێ ‌و ئانه‌ قسێ پیسێ بیێنێ واتێنێشا. (فره‌ته‌روو دژمانه‌کایچ به‌ من واچیه‌ی بێنێ) .مه‌گه‌ر ئێمه‌ گۆناعه‌ما که‌رذێنه‌ ؟ مه‌گه‌ر حه‌قوو که‌سێویما وارذه‌ن ؟ ئێمه‌ فه‌قه‌ت کارما سه‌روو وێماوه‌ بیه‌ن و هه‌رمانه‌ما په‌ی وێما که‌رذێنه‌ و ئه‌گه‌ر که‌م و کۆڕیێویچ بیه‌بۆ ته‌وانوو ئێمه‌ هه‌ر ئانه‌ بیه‌ن.
فرهنگ عقیق...